Кумыкский мир

Культура, история, современность

Къумукътюзню юлдузу

Сен аргъансыз къалар десе,

Аргъан согъуп талар десе,

Азиз халкъынг аз сама да

Сени эсден салар десе,

Инанмасбыз, Бурлият.

А.Жачаев.

Гечеги ачыкъ кёкдеги минглер, миллионлар булангъы юлдузлар барысы да бир йимик ярыкъ бермей. Тек оланы бирлери бар гёз къамашдырардай ланс этеген. Къумукътюзню юлдузу, Россияны халкъ артисткасы Бурлият Акашимовна Ибрагьимова халкъын, элин данггъа чыгъаргъан алай да-алай ланс эте чи, ону сюйкюмлю юзю, къонгуравдай чалынагъан йырлары къаравчуланы ва тынглавчуланы сююндюрегени кёп йыллар бола.

Дагъыстанда да, савлай Россияда да Бурлиятны къонгуравлу тавушуна есир болмагъан тынглавчуну тапмагъа бажарылмас эди деп ойлашаман. Шолай дюр де дюр.

Ону тав оьзенни сюзюк сувуну агъымы йимик айбат англы тавушу, гертилей де, къаравчуну сююне туруп тынгламагъа борчлу эте.

Бюлбюлню халкъ ону юрекге балгьам болагъан чарнаву-йыры себепли асил жангъа гьисап эте. Бурлиятны бюлбюл булан тенг¬лешдирегенине де, озокъда, ону бюлбюлдей тавушу себепли. Амма, деп узатыла пикруларым, бюлбюл деген сёз де, Бурлият деген сёз де къулакъгъа бир йимик чалынагъаны да, балики, гьабас тюгюлдюр.

Амма, деп де ойлашаман, бюлбюл янгыз язбашда йырлай, Бурлият буса йылны къайсы вакътисинде де – язбашда да, язда да, гюзде де, къышда да йырлай.

Йырла, Бурлият, йырла! Сен йырласанг, юреклеге сююнч гире. Йырла!

Апрель айны 26-сында Къумукъ театрны уллу залында Бурлият Ибрагьимованы яратывчулукъ ахшамы болду. О Бурлият Ибрагьимованы юбилейине багъышлангъан эди. Шонда бизин сююмлю йыравубуз Бурлиятны атына оьрде эсгерилген йимик ва оьзге хыйлы алгъышлар этилди.

ДАЛГЬАТ.

Размещено: 28.04.2007 | Просмотров: 1812 | Комментарии: 0

Комментарии на facebook

 

Комментарии

Пока комментариев нет.

Для комментирования на сайте следует авторизоваться.