Кумыкский мир

Культура, история, современность

Бугюн Гьамит РУСТАМОВГЪА 95 йыл тамамланажакъ эди.

Ону йимик бирмен деген режиссёр бир асруда бир керен тюгюл тувмай.

Гьамит Рустамов ... дагъы бир сёз де къошмайлы, янгыз ону атын эсгерип къойсакъ да, кёп зат англашыла, неге тюгюл, ол театрда уллу иш уста кюйде салгъан кёп спектакллер гёз алгъа геле. Шолардан Гьамит Алиевич янгыз «Айгъазини» ва «Къарачачны» салып къойгьан эди буса да, ол бизин эсибизде тенглеме тенги ёкъдай пагьмулу режиссёр гьисапда къалажакъ эди. Рустамов арабыздан тайгьанда, акъсакъаллар да айтагъанлай, ярты дюньядан герти дюньягъа гетгенде, ону шо пагьмусу бирден-бир ачылып, бирден-бир уллу, бирден-бир ярыкъ болуп гёрюне башлады. Сагьна инче саниятгъа юреги авагъанлар шону хасокъда гючлю гьис этгенлик оьзлюгюнден англашылып къала.

Сентябрь айны 15-нде Гьамит Алиевич Рустамовгъа 95 йыл тамамланажакъ эди. Тек, гьай аман, о бизин арабызда ёкъ. Амма ону гьакъындагъы ярыкъ эсделиклер яшай.

Гьар халкъ оьзюню анадаш театрын яратмагъа ва ону булан оьктем болмагъа борчлу...» — деп язгъан А.Н.Островский. Анадаш Къумукъ театрыбызны яратывда, ону атын данггъа чыгъарывда Гьамит Алиевич кьарны-гёнгю булан этген къуллукъ нече де уллу. Шону билмейген нагагь бир къумукъ да ёкъдур. Муна, шо саялы ол гёзден тайса да, гёнгюлден таймайгъаны, бизин юреклерибизни тёрюнде-оьрюнде яшайгъаны, ол салгъан спектакллер гьали де сагьнадан таймайагъаны, чинкдеси — къылыгъын да тас этмес, къылгъа да сюрюнмес къумукъ халкъ шо спектакллерде къайтып-къайтып урулагъан харсын огъар анасы берген акъ сютдей гьалал этегени. Неге этмесин дагъы, Гьамит Алиевич Рустамов 200-ге ювукъ спектакль салгъан. Янгыз оьзю 20-дан да артыкъ пьеса язгъан, шону да уьстевюне, Къумукъ театрны къысматы гьакъда кёплер кёп сююп охуйгъан гьайран тизив китап да чыгъаргъан.

Халкъны Рустамовгъа бакъгъан якъдагъы сюювю сёзлеге сыйышмасдай уллу эди.

Неге десегиз, ону йимик бирмен деген режиссёр бир асруда бир керен тюгюл тувмай. Шо саялы огъар гьакъ юрекден: «Гьамит Алиевич, гьали де сен бизин булансан! Халкъынг булансан!» — демеге сюебиз.

Агьмат ЖАЧАЕВ

Размещено: 16.09.2006 | Просмотров: 2269 | Комментарии: 0

Комментарии на facebook

 

Комментарии

Пока комментариев нет.

Для комментирования на сайте следует авторизоваться.