Кумыкский мир

Культура, история, современность

Бюлбюл сесли йыравну гьюрметине

фото

Март айны 25-нде Къумукъ театрда Россияны халкъ артисткасы Бурлият Ибрагьимованы концерти болду. Залгъа жыйылгъанлар бары да сююмлю йыравуна, бюлбюл сесли Бурлиятны сарынларына тынгламагъа жыйылгъан эдилер. Уллу сагьнадан таба ол къаравчулагъа савгьат этген сарынларыны санаву 400-ден де артыкъ. Гьар концертине ол янгы-янгы йырланы гьазирлей. Муна шо гюн де ону концерт ахшамы оьзтёрече тамаша башланды. Концерт берилишни къумукъ улан Нажмутдин Атлыгишиев юрютдю. Ол юбиляргъа багъышлангъан гиришив сёзюнден сонг, сагьнагъа Бурлият Акашимовнаны чакъырды. Йыравну исси къаршылай туруп, савлай зал эретуруп харс урду. Ол да, халкъына баракалласын билдире туруп, тынглавчулагъа янгы йырларындан бир нече йыр савгьат этди.

Музыкалы ахшамда йырлангъан йырлар барысы да Бурлиятгъа багъышлангъан эди. Белгили йыравлар Рукъият Сатыбалова, Рукъуят Гьамзатова, Зугьра Аселдерова, Лейла Алиева, Бурлият Элмурзаева, Зоя Чунаева, Зайнап Абсаматова, Зугъра Межитова, Жалал Бекеев, Хадижат Ибрагьимова, Къумукъ театрны артисти Байсолтан Осаев ва шолай да оьзге йыравлар юбилей ахшамда къаравчулагъа янгы йырлар савгьат этди.

фото
Йыравлар Бурлият Ибрагьимованы музыкалы ахшамында

Шатлы мажлисде Бурлият Ибрагьимова булан бирче жагьил йыравлар да арагъа чыкъды. Олар уллу йырав булан бирче дуэт йырлары къаравчуланы айрокъда кепине гелди. Миллети мычыгъыш буса да, пагьмусу янгы арагъа чыгъып гелеген Элбике Жамалутдинова къумукъ тилде айтгъан сарынын ким де ушатардай йырлама бажарды. Уллу сагьнагъа биринчилей гётерилип гелеген йыравларыбызны арасында Арсен Аскерханов З. Дайитованы сёзлерине гёре онгарылгъан йырын залда олтургъанлар харс урув булан къаршылады.

Шатлы ахшамны юрютегенлени бириси Нажмутдин Атлыгишиев де Бурлият Акашимовна булан бир нече керен дуэт булан йырлагъан йырлар къаравчулар учун уллу савгьат болуп токътады.

Юбилей ахшамда аслу гьалда белгили композиторубуз Xизри Батыргишиевни музыкасына гёре салынгъан йырлар эди. Шо гюн пагьмусу арагъа чыкъгъан Элдерхан Казимов язгъан макъамлар да къулакъгъа арив чалына эди. Ол оьзю де Бурлият Ибрагьимова булан бирче «Юлдузлар» деген йырны залдагъылагъа савгьат этди. Къыстаман Гьажиева ёлбашчылыкъ этеген «Юлдузлар» деген бийив ансамбль де юбилярны къутлай туруп, къумукъ кюйге гёре уста бийимеге бажардылар.

Бурлият Акашимовна янгыз йырланы уьстюнде ишлеп къоймай экен. Шо гюн ахшам ол яратывчулукъ булан да машгъул экени арагъа чыкъды. Къумукъ театрны артистлери ол язгъан бир нече шиъруну чебер кюйде охудулар. Бурлиятны халкъы булан ёлугъуву шо гюнгю къаравчуланы эсинде кёп замангъа къалажакъ. Неге тюгюл, ол шо гюн тынглавчулагъа 20-дан да артыкъ янгы-янгы йырларын савгьат этди. Маданиятда йыр сокъмагъын салгъан, белгили тухумдан чыкъгъан Бурлиятгъа тынглавчулар кёп гюл байламлар савгьат этди.

Барият Оьльмесова.
Руслан Жамболатов

чыгъаргъан суратлар.

Размещено: 02.04.2011 | Просмотров: 2621 | Комментарии: 2

Комментарии на facebook

 

Комментарии

kert оставил комментарий 02.04.2011, 20:12
Comment
Барият , пагьмунг арта барагъанга, гьакъ юрекден сююнебиз. Касбу ва яшав елларынг да насипли болма ерайбыз.
Bariat оставил комментарий 08.04.2011, 15:51
Comment
Кёп савболугъуз!

Для комментирования на сайте следует авторизоваться.