Кумыкский мир

Культура, история, современность

Амирхангентде межитге кюрчю таш салынды

Таргъу тавну айланасындагъы Кахулай, Таргъу, Албёрюгент, Агъачавул юртланы шагьар ва республика ёлбашчы къурумлары булангъы «тогъа тартыву» давам этиле.

Июнь айны 1-нде Таргъу тавну бетинде, бырынгъы Амирхангент болгъан ерде, шо юртланы халкъы жыйылгъан эди. Олар ата-бабаларындан варисликге къалгъан аз буса да азиз топуракъланы къорумакъ учун гьар тюрлю чаралар гёре.

Олар айтагъан кюйде, бир-бир гьаким тайпалар тавгъа еслик этме къарай, ону тарихи хожайынларыны ихтиярына къайтармас учун, не гьиллагъа да, не ялгъангъа да бара. Халкъны адилли талапларын ерге ура. Таргъу тавну дёрт де якъдан оьзге миллетлени вакиллерини «къалалары» булан къуршап, къумукъ юртлар шагьаргъа дёнюп, сингип, шоланы атлары янгыз тарихи китапланы бетлеринде къалсын учун къаст эте.

1999-нчу йыл Таргъу, Кахулай, Албёрюгент юртланы жамиятларыны сиптечилиги булан салынгъан эсделикни алдындагъы яшыл майдангьа шо гюн кёп-кёп хали-халча яйылгъан эди. Янгы межитни кюрчюсю салынажакъгъа байлавлу болуп оьтгерилген мавлетге ерли халкъдан къайры, Хасавюртдан, Кёстекден, Тотурбийкъаладан, Шавхал Янгыюртдан, Къоркъмаскъаладан, Тёбен Къазанышдан, Халимбекавулдан, Буйнакскиден, Къакъашурадан, Къарабудагъгентден ва оьзге къумукъ юртлардан гелген вакиллер де бар эди.

Мавлетни Таргъу межитни къадиси Алавутдин гьажи юрютдю. Ол айтгъан сёзлер, насигьатлар жыйылгъанлагъа бек таъсир этди. Мавлет битгенде, «белги ташны» ачылыву болду. Ону уьстюне яйылгъан яшыл тюсдеги къумачны Кахулай юрт администрацияны башчысы Салав Алиев чечди. Мармарташгъа: «Аллагьны аты булан 01.06.2008-нчи йылда Амирхангент юртну янгыртыв ишни башладыкъ. Таргъу, Кахулай, Албёрюгент, Агъачавул юртланы бирлешген жамияты», - деген сёзлер язылгъан.

Юртлулар шо янгыртыв ишни янгы межит къурув булан башлама сюе. Межитге аты данггьа айтылгъан гёрмекли пачалыкъ чалышывчу Чопан шавхалны аты къоюлажакъ. Сёйлевлерден сонг жыйылгъанлар Дагъыстанны Президенти М.Алиевни атына язылгъан кагъызны арив гёрдюлер ва бир тавушдан къабул этдилер. Намаз къылып, аш ашадылар. Аллагь къабул этсин оланы шо садагъаларын!

- Биз эсги юртубузну янгыртывну ишин башлагъанбыз. Ахырына чыкъмайлы да токътама хыялыбыз ёкъ, - дей межитни къурувну ишин юрютеген къурум комитетни башчысы Магьаммат Залибеков. - Эгер де гьакимлер бизин талаплагъа къулакъасмаса, шагьарны лап уллу майданында палаткалар да къуруп, гече де, гюн де токътажакъбыз. Тек тутгъан ёлубуздан къайтмажакъбыз.

Магьаммат агъавгъа ва бары да къумукълагъа муратларына етишме Аллагь савлукъ берсин. Аллагь буюрса, янгы межитни ичинде барыбыз да жыйылып, Яратгъаныбызгъа къуллукъ этербиз, сужда къыларбыз.


"Ёлдаш" газетни мухбири.

Размещено: 06.06.2008 | Просмотров: 1579 | Комментарии: 0

Комментарии на facebook

 

Комментарии

Пока комментариев нет.

Для комментирования на сайте следует авторизоваться.