Кумыкский мир

Культура, история, современность

Ибрагьим Керимовну эсделигине

фото

Дагъыстанны халкъ язывчусу ва адабиятны тамазасы «Бизин арабызда барынга оьктембиз» деп турагъан миллетибизни эревюллю уланы Ибрагьим Абдулкеримович Керимов дюньядан гетди деген аччы хабар газетден таба билдирилгенде, ону таныйгъанланы, огъар гьюрмет этегенлени юреклерине къайгъы салды.

Уллу Ватан давда фашистлеге къаршы къанлы урушланы ал сыдыраларында ябушгъан къоччакъ улан Ибрагьим Абдулкеримович, авур яраланып фронтдан къайтгъан сонг, савлугъуну осаллашгъанына да къарамайлы, оьзюню къасты булан ёл алып, къумукъ, дагъыстан сёз саниятны тарихинде, тил илмуда гёрмекли ерни тутуп бажарды. Ону «Разведкада яра тийип ята эдим» деп башланагъан «Ким эдинг?» деген шиърусу буса, бара-бара халкъ йырына айланып къалды.

Бабаюрт районда «Фронтовиклени яшлары» деген бизин жамият къурумубуз лап да ювукъ гёреген, оьзюне кёп гьюрмет этеген, бизин халкъны безейген адамланы бириси И.А.Керимовну гьюрметли члени этип, Уллу Уьстюнлюкню 65 йыллыгъында алгъан эдик. «Бек сююндюм! Неге десегиз, гьали сююнмеге зат, огь нече де аз болуп бара. Мени эсгергенигиз саялы, кёп савболугъуз. Сизин жамиятгъа мени алгъаныгъыз чы дагъыдан-дагъы уллу сююнч!» - деп язгъан эди бизге ол шондан сонг.

Бизин булангъы лакъырында, телефон сёйлевлеринде гьюрметли Ибрагъим агъай Бабаюртда, гьалиден тез вакътиде нече керен де болгъанын, гьатта фронтгъа да Бабаюрт райондан оьтюп, Туршунайда 10-15 гюнлер къалып, Хамаматюртда токътагъан сонг, дангыл майданлар булан Моздокгъа етгенин эсге ала эди. «Онда гючлю, къанлы давлар юрюлюп тура эди, барывубузда от-ялынгъа да тюшдюк», - деп эсгере эди.

Биз оьзюнден артыкъ къуванагъан ва оьктем болагъан сабур-саламатлы Ибрагьим агъайыбыз, бизин фронтдан къайтмай къалгъан аталарыбызны, оьзюню тенглилерини бири болгъандан къайры да, бизин замандашыбыз болуп хыйлы йыллар оьмюр сюрегени бизин бек сююндюре эди.

Ибрагьим Абдулкеримович бабаюртлулагъа, бу райондан охума гелген студент яшёрюмлеге атасыдай айрыча исси янаша эди, олар мугькам билимлер алсын деп, болгъан кёмегин де эте эди.

Бизин жамият къурумну атындан Ибрагьим Абдулкеримовични агьлюсюне, дос-къардашына, ону гиччи ватаны - Тёбен Жюнгютей юртну жамиятына оьзюбюзню терен къайгъырышагъаныбызны билдиребиз. Аллагь гюнагьларындан гечсин, Аллагь рагьмат этсин!

Вайдулла Магьмутович Шайыбов,

Бабаюрт районну «Фронтовиклени яшлары» деген жамият къурумну председатели

 


"Ёлдаш", 16.03.2012

Размещено: 17.03.2012 | Просмотров: 1697 | Комментарии: 0

Комментарии на facebook

 

Комментарии

Пока комментариев нет.

Для комментирования на сайте следует авторизоваться.