Кумыкский мир

Культура, история, современность

Газет тилге байлавлу эришив

(Дискуссия по поводу газетной лексики)

Абдулманап Гьамзаев, «Ёлдаш» газетни жаваплы секретары.

Эсги сёзлер тилни янгырта деп ойлайман

фото«Ёлдаш» газетни редакциясына эрпелили Арсланалиден гелген къумукъ сёзлени къоллавгъа байлавлу материалына кёп заман сесленмей турдукъ. «Ёлдаш» газетни редакциясында болгъан «летучкада» юрюлген лакъырдан сонг, шо масъаланы агьамиятлыгъы артса тюгюл, кемимейгенни бирдагъы керен англадыкъ. Шо саялы тилге байлавлу масъаланы гётермекни тийишли гёрдюк.

Эрпелили Арсланали оьзюню материалында булай яза:

«Ёлдаш» газетни баш редактору гьюрметли ёлдаш Камил Алиев, мен газетигизни тезден берлиги охувчусу, эрпелили Арсланали сизге бир нече ойларымны айтма сюемен. Сиз газетни баш редактору болуп ишлеме башлагъанда газет бютюнлей яхшы янгъа алышынды. Газетни гелмеклигин кёп сююп къаравуллайман. Газетни редакциясына ишин яхшы билеген ёлдашлар да жыйылгъан. Мен совет девюрню заманында сизин газетде цензор болуп 5-6 йыл ишледим, сизин ишигиз булан аз буса да танышман.

Газетде мен ушатмайгъан зат шулай: арт вакътиде газетигизде халкъ къолламайгъан ва англамайгъан, эсгиленген архаизмлени, гетген сёзлени къоллама башлагъансыз. Масъала, танкъыт (критика), танапус (перемена) ва дагъы да башгъа кёп сёзлер. Сиз алышдырагъан сёзлер кёпден къумукъ тилге гирген. О эсги сёзлени кёплер англамай. Къумукъ тилден дарслар берип, школада 30 йыллар ишлеген мен де англамайман. Шо эсгиленген сёзлени къолламагъа неге тарыкъдыр? Газетни охуйгъанланы бириси де шону ушатмай. Орус сёзлени тайдырабыз деп айта бусагъыз, журнал, стол, стакан, чайник, сумавар, пальто, радио, телевизор ва кёп-кёп башгъа сёзлени неге алышдырмайсыз? Сиз магъа айып этмегиз, мен шо эсги, халкъ англамайгъан сёзлени къоллайгъаныгъызны ушатмайман, аслу халкъ да ушатмай».

Гьалиден он йыллар алъякъда «Ёлдаш» газетни охувчулары булан Хасавюртда болгъан ёлугъувда ДГУ-ну филология факультетини къумукъ бёлюгюн битдирген бир ёлдашыбыз тап шо Арсланали айтагъан маънада сёйлеген эди. Гьали «Ёлдаш» газетни «летучкасында» болгъан лакъырда да Арсланалини пикрусун якълайгъан бир-эки адам болду. Бир нече адам берген таклиф ойлашдырмай болмай. Тек, нечакъы ойлашсакъ да, бырынгъы, эсгиленген сёзлени ташлайыкъ, халкъ англайгъан тынч тилде сёйлейик, орус сёзлени кёп къоллайыкъ деген пикруну къабул этмеге къыйын. Шо тилибизге байлавлу къурбанлыкъ не учун этилегенни мен, мисал учун, англамайман. Ватанын, элин, ана тилин, ювукъ адамын якъламакъ учун этилеген къурбанлыкъны англама ярай. Амма тилибизни енгил этейик дейген таклифигизни ана тилинде къолланагъан сёзлени англама сюймейгенлер, оланы маънасыны гьакъында ойлашма эринегенлер береген таклифлер деп англасанг тюгюл, дагъы кюйде англап болмайсан. Олай да къоркъунчлу гьалгъа тюшген аз халкъланы тиллерини оьлюмюн чалтлашдырмакъ сама тюгюлмю экен?

Тувулунгъан яшав гьаллар себепли болуп, айрокъда Дагъыстанда аз халкъланы тиллери тозулувгъа тарыгъан четим девюрде макъалада гётерилеген масъаланы тозулувну тирменине сув тёкмекликге гьисаплама ярай. Яшав сынав гёрсетеген кюйде, булай заманларда, къайта, тилни вакиллери унутула барагъан сёзлерин аян эте, бары къастын тилни сакъламакъгъа, ону оьмюрюн узакъ этмекге бакъдыра.

Шо мен макъаланы башында эсгерген, университетни филология факультетин битдирген къурдашыбыз Магьадин Бекмурзаев (мисгин болгъаны бираз бола) савунда ёлукъгъанда: «Гьали «Ёлдаш» газет булан онча да гьаллашгъанман чы, ондагъы тазза къумукъ сёзлени охуп, оьтесиз къуванаман, леззет аламан»,— деп, оьзю алда айтгъан пикругъа бюс-бютюн къаршы пикруну айтды. Муна шолай, халкъны пикрусуну алышыныву бизин сююндюрме де сююндюре, халкъына пайдалы да дюр.

Сизин юртлугъуз, эрпелили, филология илмуланы кандидаты, Дагъыстан пачалыкъ университетни алдынгъы дарс беривчюсю Юсуп Жанмавов (Аллагь рагьмат этсин) къумукъ тилни уьстюнде гечеси-гюню булан ишлеп, аврувгъа тарып, яшлайын оьлюп гетди. Гьона о - къурбанлыкъ. Ол сав заманында бизге, студентлеге: «Янгыз къойчулукъ, гьайванчылыкъ булан байлавлу унутула барагъан 500-ден де артыкъ къумукъ сёзлени, терминлени жыйгъанман», - деп окътемлик булан айтагъаны эсибизде. Дагъыстанны халкъ язывчусу профессор Ибрагьим Керимов редакциягъа гелип де, телефон сёйлеп де, оьзю язып да, тил масъалалагъа байлавлу редакцияны къуллукъчуларына насигьат берип турду. Унутула барагъан сёзлени къайтара къолламакъны якълай эди.

Къумукъ алим, ахтарывчу Гьасан Оразаев сийрек къолланагъан, унутула барагъан къумукъ сёзлени жыя, тилибизни сакъламакъны гьайын эте. Гьона, олай тилибизни къысматы учун жаны авруйгъан адамларыбызны гьаракаты, къасты тилибизни сакълама кёмек эте.

Бырынгъы къыйын сёзлер негер тарыкъдыр, архаизмлени къолламай, енгил сёйлейик дейгенлер енгил ёлну сайлайгъанлар, яшавда тувулунагъан къыйынлыкълагъа къаршылыкъ билдирме сюймейгенлер деп ойлайман. Оьсмейген жамият тозулувгъа тарый деп айтыла. Тил де шолай.

Редакцияда болгъан пикру алышдырывда шо бырынгъы, эсги сёзлер негер тарыкъ, гьалиги яшав талап этеген кюйде енгил сёйлейик деген таклифлер чалынды. Шолай пикруну къумукъ журналистлер арагъа чыгъарагъангъа тамаша боласан. Сюйген янгъа бурмагъа тил арбаны арышы тюгюл чю. Адабият тилибиз асасланагъан сёзлени нечик къоллама герекни гьакъында токъташдырылгъан орфография сёзлюгюбюз бар, къумукъ тилни грамматикасы бар. Сюйген кюйде, тынч кюйде сёйлегиз деп айтагъанланы адабият тилни авуз тилден, очар тилден, базар тилден айырып болмайгъанлар деп гьисап этме ярай. Яшавну токъташдырылгъан низамы, закону бар йимик, тилни де закону бар.

Сиз гётереген масъаланы гьакъында дагъы да бир-эки белгили адамларыбызгъа сорап къарадыкъ. Оланы жавапларын тёбенде беребиз.

Гьюсейн Адилов — жамият чалышывчу, Жалалутдин Къоркъмасовну атындагъы фондну ёлбашчысы:

фотоУллу алышынывланы девюрюнде ана тилни сакъламакъ тынч масъала тюгюл. Тек гьар инсан оьзюнден гьасил болагъан къастын этмеге борчлу. Некъадар къасткъылып чалышып айланса да, ана тилинде китаплар, газетлер охумайгъан ёлдашланы бизин ругь байлыгъыбызны, ана тилибизни сакълавда этеген кёмеги, къошуму аз болур. Бир-бир охувчулар газетдеги сёзлени англамайбыз, масала, танкъыт, сиясат, гьаракатчы деген ва башгъаларыны орнунда орус сёзлени къоллап, язып къойса ярамаймы деп соравлар берелер. Охувчулар тилде аз къолланагъан сёзлени маънасын англамайгъанлыкъ ва англама, билме къаст этмейгенлик талчыкъдыра. Ана тилде бар сёзлени къолламай, башгъа тилдеги сёзлени къоллап язмакъ, сёйлемек — о чу гьайсызлыкъны биринчи аламаты. Бизин тилде ёкъ сёзлени башгъа тюрк миллетлерден алып къоллама да толу ихтиярыбыз бар. Биз де тюрк халкъны наслусунданбыз. Тилни тынч уьйренмек ва яхшы билмек учун къумукъ китапланы тавушун чыгъарып кёп охуса яхшы болур. Къумукъ асарларда башгъа тиллерден сёзлер аз къоллана. Айтагъаным, шиъруланы, хабар китапланы, газетлени агьамияты гючлю. Охувчу яшёрюмлени ана тилни уьйретивню масъалаларына бакъгъан жанланыв юрекни сююндюре, тилибизге оьлюм ёкъ деген яхшы гьислени тувдура.

Бадрутдин Магьамматов — шаир, Дагъыстан китап издательствону къумукъ бёлюгюню редактору:

фотоОьзге бир башгъа тилден гелген сёзлер къайсы тилде де ёлугъа. Шо якъдан алгъанда, къумукъ тилге арап, тюрк, орус тиллерден гелген сёзлер бар. Орус тиллерни таъсири къолай. Инкъылапдан бери якъда биз орус сёзлеге уьйренип, тюшюнюп къалгъангъа гёре, тюрк, арап тамуру булангъы сёзлер бизге авур тийсе де, тийишли ерде оланы къолламакъны бир де заралы ёкъ. Неге тюгюл де, шо бизин къумукъ тилни тамуру ортакъ тюрк дюньяны тиллерине ювукъ эте. Олар, масала, маъдан, мактап, муаллим, медресе, устаз йимик сёзлер ва оьзгелери. Башгъа тюрк тиллерде къолланагъан, бизде тас болгъан сёзлени де къолласакъ, бизин тилибиз бай болса тюгюл, ярлы болмас.

Газетибизни гетген йыл ноябрь айны 2-синде чыкъгъан номериндеги макъалада гётерилеген темагъа байлавлу, минасы эрпелили Агьматнаби Апашев де булай яза: «Неге газетде орус сёзлени кёп къоллайсыз? Аварланы «Гьакъыкъат» деген газетин алып, иш этип тергеп къарагъанман: оларда орус сёзлер аз къоллана. Шонча бай къумукъ тилни ярлы этесиз. Мен «Ёлдашда» къаршылашагъан бары да орус сёзлени язып алып, къаршысына къумукъ сёзлени салып, гиччи сёзлюк тизип тураман».

 


 

Рашит Гьарунов, журналист

Эсги сёзлени тирилтебиз деп, тилибизни оьлтюрмегей эдик

(А.Гъамзаевни «Эсги сёзлер тилни янгырта деп ойлайман» деген макъаласына гёре)

фото«Ёлдашны» 11-нчи январда чыкъгъан номеринде газетни жаваплы секретары Абдулманап Гьамзаевни «Эсги сёзлер тилни янгырта деп ойлайман» деген макъаласы бар. Шу тема бизде гьар заманда да агьамиятлы болгъан. Архаизмлени (къоллавдан чыкъгъан, эсги сёзлени) янгыртма герек дейгенлер де бар. Халкъны тилине гирип битген орус сёзлени гери урма тюшмей дейгенлер де бар. Абдулманап Гьамзаев биринчи пикруну яны. Ону макъаласында эсгерилеген эрпелили Арсланали экинчи пикруну яны. Гертилик, кюйге къарагъанда, гьар заманда йимик, оланы ортасында болма герекдир. Буса да, магъа да артдагъы пикру ювукъ.

Лап алдын бир тилевюм бар: А. Гьамзаевни бир-бир пикруларына рази тюгюллени «тилни душманларына» гьисап этип къоймагъыз. Мен тилимни душманы тюгюлмен, тек къумукъ тил жанлы болгъанны, оьсгенни, янгырып, гючленип, ону бары да халкъ сююп-сююнюп къоллагъанны сюемен.

Мен ойлашагъан кюйде, бир-бир орус сёзлер халкъыбызны тилине гирип беклешген буса ва бугюнгю къумукъ тилде шо маънаны толу береген къумукъ сёз ёкъ буса, орус сёзню къабул этме ярай. Бир-бир гезиклерде буса орус сёзлени къолламасанг, оюнгну-пикрунгну толу кюйде ачыкъ этип болмай къаласан. Мисал учун, терминлер бары да халкъларда, къайсы тилден алынгъан буса, шо тилде йимик айтыла-языла. Бизде буса, терминлени де гёчюрме белсенелер. Гьакъыкъатда, тил де авур, англама четим бола.

А. Гьамзаев: «Амма тилибизни енгил этейик дейген таклифигизни ана тилинде къолланагъан сёзлени англама сюймейгенлер, оланы маънасыны гьакъында ойлашма эринегенлер береген таклифлер деп англасанг тюгюл, дагъы кюйде англап болмайсан», - деп айыплавлар эте. Халкъны кёп яны газетни-китапны-журналны тилни «англама сююп», «эринмейгенлигин» гёрсетмек учун тюгюл, пайдалы маълумат, леззет алмакъ учун охуй. Эгер язылгьан асарны тили англама къыйын буса, ол ону, сюйсек де-сюймесек де, охумажакъ. Тюз де этежек. Айлангъан сайын халкъгъа «англамай», «эринчек», «тилине абур этмей», «патриотлар тюгюл, газетге-журналгъа язылмай» деп айып салып турмакъны мен тюз гёрмеймен. Язагъанланы кёплери оьзлер де бир-бирин охуп турмайлар чы. Мен де охумайман бары да авторланы. Тергевюмню тартса, къужурлу янгылыкъ-маълумат бар буса, охуйман. Шолайдыр башгъалар да.

Дюньяда бары да тиллер тюрлене, алышына, оьсе. Оьсе-алышына туруп, бир нече асрулардан тамур тилинден башгъа тил арагъа чыгъа. Шогъар уллу тиллерден мисаллар гелтирейик: бырынгъы араплар, жугьутлар, греклер, оруслар сёйлеген тиллер алышына туруп, гьалигилер тамур тиллерин англама да англамай. Шогъар бирев бир зат да этип болмай. Биз де гючденден архаизмлени (эсги сёзлени) тирилтебиз десек, гьабас иш этегенлерден болажакъбыз. Жамиятны, тилни оьсювюню законларын бузма бажарылмай.

Аслу зат: халкъ - тилни еси, халкъ тилден алдын, халкъ яратгъан тилни (тил яратмагъан халкъны). Язагъанлар буса шо тилни есини алды булан тюгюл, арты булан юрюме герек. Бизин арабызда халкъны уьйретме къарайгъанлар кёп, халкъдан уьйренегенлер, халкъны гьайындагъылар етишмей. «Биз, алимлер, журналистлер, язывчулар, бек билебиз, халкъ биз айтагъан кюйде охусун, сёйлесин» деп ойлашагъанлар янгылыша. Чебер адабиятны, илмуну тили оьзтёрече болма да ярай, тек газетни тили халкъгъа ювукъ, енгил, англашынагъан кюйде болма герек. Авторну ою ачыкъ, сёзю герти, темасы да агьамиятлы буса, ону тилин англама да тынч бола.

«Ёлдашны» тилин англамайбыз», - дейгенлер кёп ёлугъа. Къуру шолай адамланы «англавсузлар» деп айыплап турсакъ да, дурус болмас. Язагъанлар да оьзлер оьзлеге критика гёзден къарама герек. Охувчугъа «тилни англама эрине» деп айып салмайлы, журналистлеге оьзлеге «халкъгъа англашынагъан кюйде языгъыз» деп чакъырыв этер эдим. Журналист учун биринчи ерде «тилни тазалыгъы» тюгюл, гертилик, ойну ачыкълыгъы, сёзню маънасы болма герек.

А. Гьамзаевни бир оюна разимен. Тилни токъташдырылгъан грамматикасы, сёзлюклери бар. Шоланы дазуларындан чыкъма яратылмай. (Олай болгъан сонг, сёзлюклеге гирген сёзлеге «эсги» демек де тюз тюгюл).

Мен оьзюм де, кёплер йимик, къумукъ тил орус сёзлерден эркин болгъанны сюер эдим. Тек сюйген булан битип къалмай чы. Биз реалистлер болма тарыкъбыз. Яшавну агъымындан артда къалма тюшмей. Язагъанлар, шо агъымдан чыгъып, тилни тазалыгъын гючден сакълама къараса, яшав, халкъ алгъа гетежек, тил олардан айрылажакъ.

Орус сёзлени алагъанда да, архаизмлени къоллайгъанда да гьакъыллы янашыв (разумный подход) болма тюше.

Оьтген асруну 20-нчы йылларында Тюркияда ататюрк тилге реформа этип, бары арап сёзлени орнуна таза тюрк сёзлени гийирген. Янгы сёзлер оланы тилинде беклешип де къалгъан. Тюрк тил - пачалыкъ тил, бары да къурумланы ишлери, печат, информация, адабият, инчесаният пачалыкъны янгыртылгъан тилин къоллап, арадан заман гетип, о тил уьстюн гелип, бары да халкъгъа ортакъ болуп токътай. Бизинки пачалыкъ тил тюгюл. Бизге олай бажарылмай.

Гьасиллер:

1. Журналист учун биринчи ерде тилни тазалыгъы тюгюл, пикрусуну агьамиятлыгъы, сёзюню гертилиги болма тюше.

2. Тилни тазалыгъын сакълав аслу мурат болма тюшмей. Тил жамиятны алышынывуна гёре кюйленме герек.

3. Эсги сёзлени илмуда, адабиятда генг кюйде къоллама ярай.

4. Газетни тили енгил, охувчугъа тынч англашынагъан кюйде болма герек (халкъны тилине «очар тил», «базар тил» деп, ону кем этип гёрсетме тюшмей: шо очар, базар тиллерден тизилген адабият тил).

 


 

Ибадулла Гьажиев, муаллим, Хасавюрт (къазмалы)

Эсгиленген сёзлер тилни байыта

Эрпелили муаллим Арсланали булан бютюнлей, тюбюкъарадан рази тюгюлмен. «Эсги, халкъ англамайгъан сёзлени къоллайгъаныгъызны ушатмайман, аслу халкъ да ушатмай», - деген Арсланалини пикрусуна, ушатмасанг ушатмай тур, биз ушатабыз, арив де, тийишли де гёребиз деп къошма сюемен. Ёлдаш А.Арсланали, газетни аслу борчларыны бири – халкъны тил байлыгъын ачмакъ, артдырмакъ, билмейгенлеге билдирмекдир.

«Бырынгъы, эсгиленген сёзлени ташлайыкъ, халкъ англайгъан тынч тилде сёйлейик, орус сёзлени кёп къоллайыкъ»,- деген таклифге рази болмакъ чы ана тилде сёйлевюбюзге зайыплыкъ деп санайман. Гийимибиз - орус опуракъ, ашавубузну орус тилден янгыз илмугъа, техникагъа байлавлу терминлерден (истилагьлардан) къайрыларын тилибизге гийирмек, ону аздырмакъ бола.

Эсги сёзлени къайтарып тилге гийирмек, къолламакъ гьажатлы тюгюл дегенлер бек уллу янгылышалар, айрокъда олар муталимлеге тил уьйретеген муаллимлер буса. Оланы билме, эсде сакълама къыйын, авур демек де далил тюгюл. Муаллимни оьмюрю уьйренип де, уьйретип де гетме буюргъан, борчлу талигь.

Ойлап къарайыкъ, биз оьзюбюз - муаллимлер эсгиленген сёзлени билмей бусакъ, охувчулагъа бырынгъы халкъ авуз яратывчулугъуну асарларын дарсларда нечик англатма болабыз, оларда чы эсгиленген сёзлер толгъан. Мисал учун, ёммакъларда, халкъ йырларда, такъмакъларда, гьар абатда дегенлей ёлугъа буса. Бир нече мисал: адирне, айбалта, алыс, атолу, баяр, гюбе, къанга, эрк, Эдил, Анадол, ясав, яссы ва булай да хыйлылары.

Аталар сёзлени, айтывланы, чечеген ёммакъланы нечик англатма, ачма-чечме болабыз? Оланы чы кёбюсю къадим заманларда бизге эсгиленген сёзлер булан тизилген. Бир нече мисал: абдюгер, айман тюз, айман кёл, дол, доллукъ, къоду, къумсармакъ, кели, келек, муштари, пёшюк, сал, сом алтын, супа, сюнкю, тавхана, тулан, ябагъы, ябу ва башгъалары.

Эсгиленген сёзлени эгердим билмей бусакъ, машгъур, макътавлу классигибиз Йырчы Къазагъыбызны асарларын оьзюбюз нечик англайыкъ ва яшлагъа нечик англатайыкъ? Айтыгъыз! Буракъ, ебе, дагъана, къозалакъ, кана, атоллу, ябу, чатакъ ойболат, тюмен, мукъ, питат ва дагъы да ону шиъруларындагъы булай, гьали эсгиленген, кёп-кёп сёзлени англатып болмай бусакъ.

Олай буса, эсгиленген, биз билмейген сёзлер булан бирче яшавун тас этежек халкъ эпос, къанна къазакъ йырларыбызны, аталар сёзлерин, айтывланы, чечеген ёммакъларыбызны ва олагъа къошуп, адабият тилибизни кюрчюсюн салгъан, оьзюню тенги ёкъ пагьмулу Йырчы Къазакъны яратывчулугъун инкар этейикми, ташлайыкъмы? Оларсыз бизге не къала, сонг биз не къумукъларбыз? Эсгиси ёкъну янгысы болмас деп, дурус айтылгъан. Тилни тас этсек, тарихибизни де тас этежегибизни унутмайыкълар. Тарихибизни тас этсек, оьзюбюзню, оьзлюгюбюзню, яни, миллетибизни тас этежекбиз. Къысгъача айтгъанда, тилибизде бар, тек эсгиленген сёзлерибизни орнунда орус сёзлени гелтирсек, къолласакъ, къанлы, жанлы бай тилибизни оьз къансыз, оьз жансыз зайып тилге айландыражагъыбызгъа шеклик этме тюшмей.

Совет девюрде Ленинграддагъы Гюнтувуш тиллени институту гьар йыл яйда, каникулланы заманында, бир нече студентлерден топлап, Сибирге, Алтайгъа, гьатта Китайдагъы уйгъурлагъа экспедиция йибере болгъан. Эгер шолай экспедиция 1-2 эсгиленген, не де буса 2-3 диалект сёз табып гелсе де, экспедиция борчун кютгенге санала болгъан. Мунда ойлашма зат бар.

Тилден, пешемейли, бар сёзлени ташлама герекмей, некъадар, оланы таселгенлерин де табывну, жыйывну гьайын этме, асырап, аявлап сакълама да, къоллама да герекбиз.

 


 

Абдулманап Гьамзаев, «Ёлдаш» газетни жаваплы секретары.

Адабият тилни учуз этме ярамас

фотоР.Гьарунов оьзюню макъаласында: «Газетни тили халкъгъа ювукъ, енгил англашылынагъан кюйде болма герек», - дей.

Олай болгъанда, адабият тилибизни ташлап, енгил тилни (огъар «очар тил», «базар тил» деп айтагъанымны Р. Гьарунов мысгъыллав гьисап эте буса, орусча «просторечье» деп айтайыкъ) арты булан юрюп турма тарыкъбыз дагъы. Адабият тил «Адабият сёзлюгюнде» берилеген англатывгъа гёре, «радиону, телевидениени, школаны, сагьнаны, илмуну, публицистиканы, хас язывну тили. Адабият тил - умуми халкъ тилини ишлетилген, бир къалипге гелтирилген, шо тилде сёйлейгенлер къабул этген уьлгюсю. Башгъалар нечик сюйсе сёйлесин, тек оьрде эсгерилген къуралланы касбучуларына шо адабият тилни билмек ва шо тилде сёйлемек ва язмакъ - борч. Сёйлеп болмай буса, шолай касбучуну даражасы оьзюне салынгъан талаплагъа жавап бермей деп гьисаплама ярай.

Оппонентибиз «гьакъыкъат эришивлюкде тувулуна» деп де къоша.

Гьакъыкъат эришивлюкде тувулуна деп, бизден кёп алда яратылгъан къалиплени уьстюнден эришип турсакъ, башгъалар бизге кюлемесми?

Радиодан, телевидениеден, компьютерден янгыз орус сёзлер агъылып тура буса, межитлерде насигьатлар орус тилде бериле буса, бизин халкъгъа оьзюню адабият тилинде сёйлеме, озокъда, тынч тюгюл. Амма шо гьалгъа къаршылыкъ билдирмей турсакъ, тилибизни, гертиден де, тас этербиз.

 


«Ёлдаш», 11-01-2013, 15-02-2013

Размещено: 17.02.2013 | Просмотров: 2456 | Комментарии: 0

Комментарии на facebook

 

Комментарии

Пока комментариев нет.

Для комментирования на сайте следует авторизоваться.