Кумыкский мир

Культура, история, современность

Эки къурдаш эришсе…

Фашизмни утгъан уллаталарыбыз, арадан йыллар гетип уллу уьлкебизде шо яман аврув къайтара яйылмагъа башлажакъны билген эди буса, балики, олар жанларын къыйма да къыймас эдилер деп ойлаша боламан. Шо, озокъда, мени ойларым. Амма теренлешсе, ойлашмагъа кёп зат бар. Неге тюгюл де, бугюн бизин уллу уьлкебизни шагьарларында ва гиччи юртларында фашизмни урлугъу чачыла ва шо яман аврув савлай жамиятда югъагъан аврувну чалтлыгъында яйылып бара.

Мен ишим булан байлавлу болуп Интернетге кёп гиремен. Озокъда, дюньяда ва Россияда болуп турагъан янгылыкъланы да аслу гьалда мен бютюндюнья торундан билемен. Тек не хайыр, оланы кёплеринде бизин кавказлылагъа ачыкъдан-ачыкъ къаршы турувлар эслене. Къайсы сайтгъа гирсенг, биринчи ерге кавказлылар булан байлавлу маълуматлар салына. Озокъда, мен бу ерде «бизинкилер» яхшы, «уллу агъабыз» оруслар бизин яман этмеге къасткъылып айлана деп айтмагъа сюймеймен. Бизин Кавказдан чыкъгъанланы да терси бар. Тек бары да якъдан олар да тюз деме бажарылмай.

Уьлкеде юрюлеген политикагъа къулакъ салып къарасанг, яшларыбызны гележегине талчыкъмай болмайсан. Гьатта бир-бирде уьлкебизде фашизмни урлугъун чачагъангъа пачалыкъны башын тутгъанланы немкъорайлыгъы, туврадан айтгъанда, олар милли аралыкълагъа байлавлу масъалаланы уьстюнден къувукъ себип, тюбюнден сув йиберип турагъан йимик гёрюне. Шогъар мисаллар да ёкъ тюгюл.

Гьали-гьалилерде тахшагьарыбыз Москвада дагъыстанлылар трамвайда бичакълар булан чабып айлана эди деп, сав жуманы узагъында дегенлей Интернетдеги маълумат берив сайтлар талмады. Мухбирлени тилевюне гёре, «Эхо Москвы» деген радиодан кавказ республикаланы ёлбашчылары сёйледилер. Шонда Дагъыстанны Президенти М.Магьамматов сёйлеген кюйню мен де ва оьзге дагъыстанлылар да ушатгъандыр деп эсиме геле. Айтагъаным, Дагъыстанны Президенти М.Магьамматов да эсгерген кюйде, маълумат берив агентликлер оьзлени билдиривлеринде тюкенде 3 адамны оьлтюрген Москвадагъы «Царицыно» ОВД-ни ёлбашчысы Евсюковну, Краснодар крайдагъы Кущевский станицагъа он йылланы боюнда еслик этип тургъан, онлар булан адамны оьлтюрген Цапкону бандасыны ва олай оьзгелени миллетин бир де эсгермей. Амма кавказлылагъа бакъгъан якъдан буса шо агентликлер оьзлени къаравларын яшырмай. Яни, кавказлылар – къонакълар, ерли маданиятгъа къыйышмай буса, оьзлени ерлеринде турсунлар деп ачыкъдан билдирелер. Сайки, Россиягъа баргъан дагъыстанлылар оьзлени милли культурасын, динин, тилин унутуп, орус халкъгъа дёнме, оьзлени олар йимик гьис этмеге борчлу.

Йымышакъ этип айтгъанда, шогъар адамны кюлкюсю геле. Неге тюгюл де, Россияны бары да байлыгъы – ону халкълары. Гьар миллет оьзюню маданияты булан бай. Дагъы болмагъанда, шо Россияны Баш Закону – Конституция булан да якълангъан.

Озокъда, Россияны Президенти В.Путин де айтгъанлай, уручу туснакъда болма герек. Бандит де шолай. Сюйсе о кавказлы болсун, сюйсе орус, сюйсе жугьут. Бандитни миллети ёкъ. Яманлар къайсы миллетни арасында да бар. Амма, москвалыланы ва олагъа ювукъда ерлешген Россияны оьзге шагьарларында яшайгъанланы ойларына гёре, Россияда бары да жинаятчылыкъны этегенлер – кавказлылар ва олар булан къатты кюйде сёйлемеге тюше. Яшырмагъа тарыкъ тюгюл, сёйлеп де туралар. Кавказлыланы теберип-тюртюп дегенлей, Россияны шагьарларындан къуваламакъны масъаласын да гётерелер.

Бизин футбол команда «Анжини» ва ону якъчыларыны айланасында не хабарлар юрюмей? Шо гьакъда сав газетни бетин толтуруп язса да ярар йимик. Мен шо гьакъда айтма сюймеймен. Буса да артда «Анжини» якъчылары булан болгъан четим гьалны эсгерме сюемен. Гьали-гьалилерде «Анжини» «Локомотив» булан болгъан оюнундан сонг, бир-бир маълумат агентликлер билдирген кюйде, «Анжини» якъчылары метрогъа тегин гирмеге сюйген. Амма оланы алдын ОМОН къыркъып токътагъан. Арада болгъан эришивлюк ябушувгъа айлангъан ва онлар булан дагъыстанлыланы полицияны бёлюклерине элтген. Биринчи маълуматны охугъанда, озокъда, инанмай болмайсан. Футбол фанатланы янындан арт вакътилерде не тюрлю жинаятчылыкъны да гёрмеге болагъаны ачыкъ мисал. Шо маълуматны охугъан сонг, Москвадагъы «Дикая дивизияны» уьюрю, къардашым ва къурдашым булан телефондан сёйледим ва шолай эришивлюк бютюнлей болмагъанны билдим. Экинчи гюн шо гьакъда Моск­ваны МВД-си де билдирди. Гьасили, ялгъан маълуматны къасты булан «Анжини» ва ону якъчыларыны «душманлары» бир гюнню ичинде бир нече керенлеге артды. Шо эсгерилген маълуматлагъа россиялыланы сесленивлеринде де гёрюндю.

Эки къурдаш эришсе, ятлар сююнер дегенлей, эгер региондагъы гьалны къолайлашдырмагъа сюеген гючлер савлай Россиядагъы фашизмни урлугъун чачагъанланы токътатмаса, гьал ювукъ арада къолайгъа алышынажакъ деме къыйын.


«Ёлдаш», 07-12-2012

Размещено: 08.12.2012 | Просмотров: 2159 | Комментарии: 0

Комментарии на facebook

 

Комментарии

Пока комментариев нет.

Для комментирования на сайте следует авторизоваться.