Кумыкский мир

Культура, история, современность

Атлары даимлешдирилди

Февраль айны 15-нде, бизин асгерлер Афгъанистандан чыкъгъанлы 20 йыл тамамлана. Парахат яшавну девюрюнде тувуп оьсген яш уланланы юрюлеген дав гьаракатланы ортасына салгъан алдын инг къуватлы гьисапланып тургъан уьлке тезден тозулгъан. Тек берилген антына амин къалып, шо йылларда тыш пачалыкъны аманлыгъын якълавда оьзлени гьеч де аямай къоччакълыкъ гёрсетгенлеге айрыча абур этиле. Арадан заман оьтюп, наслулар алышынса да, олар башдан гечирген акъубалар, жанлары къыйылгъанларыны атлары унутулмай.

Февраль айны 11-нде, Къарабудагъгентдеги ял алыв бавунда афгъан, олай да артдагъы йылларда юрюлген оьзге савутлу пелекетлени къурбанларына эсделик ачылыв булан оьрде эсгерилген тарх алданокъ белгиленди.

Шо агьвалатгъа байлавлу оьтгерилген жыйында янгыз афгъан, венгер, мычыгъыш дав гьаракатланы ортакъчылары тюгюл, районну гьакимлик къурумларыны вакиллери, тюрлю-тюрлю идараланы къуллукъчулары, чакъырылып гелген къонакълар, охувчу яшлар ортакъчылыкъ этдилер. Жыйынны яшоьрюмлени ишине къарайгъан район комитетни председатели Г. Темирова юрютдю. Ол оьзюню къысгъаракъ гиришив сейлевюнде бугюнлерде белгиленеген тарх булан афгъанланы къутлады. Олагъа яшавунда кёп-кёп яхшылыкълар, къатты савлукъ ёрады ва шу ёрукъда жыйылмакълыкъны мурадын англатгъан сонг, аслулар боюнда мердешленип гелгени йимик, дав майданларда игитлик гёрсетгенлени уьлгюсюн гележекде де оьсюп гелеген яш наслу уллу ругьланыв булан къабул этежегине инанагъанын билдирди. "Къарабудагъгент район" муниципал кърулувуну башчысы Къ. Исаевге жыйынны ачмагъа сёз берди.

- Бизин Ватаныбызны тарихине гёз къаратсанг, замангъа таби болмайгъан агьвалатлар ёлугъа. Шоланы арасында 10 йыл юрюлюп тургъан Афганистандагъы дав гьаракатлар мекенли ерни тута,- деди ол.

Бизин райондан шо уьлкеде оьзюню асгерлик борчун 95 адам кютген. Умуми кюйде алгъанда, шо агьвалатлар, шо замангъы яш наслуну яшавуна таъсир этмей къоймагъан. Бизде бугюн олагъа, ювукъларына, дос-къардашына оьзюбюзню теренден разилигибизни билдирмеге, шо давдан къайтмай къалгъан жагьил уланланы эсибизге алмагъа жыйылгъанбыз,-деп узатды ол. -Арадан нече йыллар оьтсе де, бизин уланларыбыз Афгъанистанда гёрсетген къоччакълыкъларын унутмагъа гьакъыбыз ёкъ. Неге тюгюл де, олар оьзлени асгерлик борчларын намуслу кютдюлер, Ватанына аминлигин гёрсетдилер.

Жыйында чыгъып сёйлеген РФ-ни афгъан агьвалатланы ветеранларыны Дагъыстан регион бёлюгюню ёлбашчысы М.Хадуллаев, Къарабудагъгент, Къаягент районланы ва Избербаш шагьарны, военный комиссары М.Гьабибов, Уллу Ватан давну ва загьматны ветеранларыны район советини ёлбашчысы Гь.Гьажиев афгъан агьвалатланы ортакъчыларыны атына айтылгъан къутлав сёзлеринден сонг, оланы къоччакълыгъына оьр багьа бермеге тийишли гёрегени гьакъда айтдылар.

Афгъанистанда жанларын къурбан этгенлени дос-ювугъуну атындан Гь.Гьюсейнов оланы игитлигин эсге алмагъа жыйылгъанланы барысына да, олай да ерли гьакимлик къурумуну вакиллерини шо гюнгю бек шабагъатлы иши саялы разилигин билдирди.

Эсделикге ябылгъан акъ шаршавну Къ.Исаев, М.Хадуллаев, афгъан агьвалатланы ортакъчысы И.Дагьиров тюшюрген сонг, эсделикге атлары язылгъанланы асгер ёлдашлары огъар гюл байламлар салдылар. Къарабудагъгент гимназияны охувчусу И.Исмайылов оьзю охугъан шиърусу булан оьсюп гелеген яш наслуну вакиллери гьеч бир затдан да тартынмай оьзлени герти патриотлар ва интернационалистлер гьисапда гёрсетмеге бажаргъанлар, Афгъанистанда дав юрютгенлени алдында баш иегенни исбатлады.

"Къарабудагъгент район" муниципал къурулушуну администрацияны атындан афгъан ва мычыгъыш агьвалатланы барышында оьлгенлени агьлюлерине акъча савгъатлар берилип, харж якъдан кёмек этилди.

Размещено: 28.02.2009 | Просмотров: 2458 | Комментарии: 0

Комментарии на facebook

 

Комментарии

Пока комментариев нет.

Для комментирования на сайте следует авторизоваться.