Кумыкский мир

Культура, история, современность

"Сёйлей Магьачкъала!"

Дагъыстан радиогъа - 80 йыл

Биз оьрде эсгерген исбатлы, ярыкъ шо эки де сёз булан Дагъыстан радио ватандашларыбызны уьйлерине гирип, эртенлер юреклерин ачагъанлы, ахшамлар гёнгюн алагъанлы 80 йыл тамамланды.

Шо къуванчлы агьвалатгъа багъышланып, Магьачкъаладагъы М.Горькийни атындагъы театрны залында шатлы жыйын оьтгерилежек.

Дагъыстанда янгы яшав къурувда, республиканы экономикасын, культурасын оьсдюрювде, яш наслуну тарбиялавда бары да милли тиллерде берилишлер юрютеген Дагъыстан радио бек уллу ва агьамиятлы роль ойнагъан ва гьали де ойнай.

Дагъыстанлыланы эркинлигин, оланы маданиятыны даражасын гёрсетеген бир белги бар буса, шо да республиканы милли тиллеринде юрюлеген радиоберилишлеге тынгламагъа болагъанлыкъдыр. Дагъыстан радиону къуллукъчулары тюрлю-тюрлю девюрлерде чалышгъан, яшавну тармакъларын оьсдюрювде актив кюйде ортакъчылыкъ этген, Уллу Ватан давну йылларында фронтгъа гетген, онда къоччакълыкълар гёрсетген.

Гертиден де, Дагъыстан радиону милли редакциялары, оланы ичинде къумукъ тилде берилишлер юрютеген редакция да, макътавлу ёлну оьтген. Дагъыстан радиону къумукъ редакциясыны иши гьакъында оьзюню сыйлы юбилейини алдында бугюн бир нече сёз айтмагъа сюемен.

Къумукъ радиону юбилейи гьакъында сёз юрюлегенде, ону тарихин къысгъача гёзден гечирмекни оравлу гёрдюм.

Давдан алдагъы йылларда да, давну йылларында да Дагъыстан радиону къумукъ редакциясында кёп белгили адамлар ишлеген. Оланы арасында биз айрыча эсгермеге сюегенлерден старший редактор Абузагьир Батыров, политредактор Зиявутдин Дайибов, таржумачы Вагьит Дыдымов, редактор Басир Мустапаев ва оьзгелери бар.

Давдан сонггъу йылларда тюрлю-тюрлю къуллукъларда Жамболат Бекмурзаев, Абдулхалыкъ Хабилов, Расул Расулов ишлеген. Шо замангъы "Дагъыстан" деген телерадиокомитетни председатели болуп Дагъыстанны халкъ шаири Анвар Гьажиев чалышды.

Къумукъ редакцияда кёп йыллар Дагъыстанны халкъ шаири Аткъай Гьажаматов ишледи.

Гечги йылларда Дагъыстан радиону къумукъ редакциясында Шарип Албериев, Магьамматсайит Маликов, Къурманали Шамсутдинов, Ибрагьим Шабаев, Ибрагьим Ибрагьимов, Айнутдин Мамаев, Абдулгьамит Татамов ва оьзгелери ишлегенлер.

Миллетлеге гёре редакциялар къурулгъанда, къумукъ тилде берилишлер юрютеген баш редакцияны баш редактору болуп биринчилей Бургьан Бамматов ишлеген. Ондан сонг шо къуллукъда Салигь Валиюллаев, Сиражутдин Токъболатов, Насрулла Жабуев ёлдашлар чалышгъан.

Дагъыстан радиону къумукъ редакциясында тюрлю-тюрлю йылларда шаир Абсалам Аскерханов, язывчу Мустапа Гьюсейнов, шаир ва композитор Пайзурагьман Мантаев де кёп иш этген.

Дагъыстан радиону къумукъ редакциясында ишлеген бирдагъы биревню гьакъында айрыча айтмагъа тюше. Ону къысматы Дагъыстан радиону къысматы булан тыгъыс кюйде байлавлу. Биз оьзюню гьакъында айтмагъа сюеген адам - Галина Жамалутдиновна Бекболатова. РФ-ни маданиятыны ат къазангъан къуллукъчусу Галина Жамалутдиновна Дагъыстан радиону къумукъ редакциясыны оьр категориялы диктору болуп 60 йылдан да къолай ишлеген. Ол кёп йыллар ва намуслу кюйде ишлегени саялы Гиннессни китабына - планетаны рекордларыны китабына язылгъан. Ол "Интерстронг" деген дюньяны рекордсменлерини клубуну дипломуна ва медалына ес болгъан. Галина Жамалутдиновна бугюн пенсияда буса да, къумукъ редакция булангъы аралыгъын уьзмей.

1990-нчы йылдан 2006-нчы йылны август айына ерли къумукъ редакцияны старший редакторуну къуллугъунда Дагъыстанны инче саниятыны ат къазангъан чалышывчусу Зубайыл Хиясов да ишледи. Белгили болгъаны йимик, ол 2006-нчы йылны август айында милицияны хас операциясы оьтгерилеген вакътиде гечинди.

Оьзюню яшавуну артдагъы 35 йыл оьмюрюн редакцияны мухбирини къуллугъунда Солтанбек Солтанбеков да йиберген. Ол шо вакътини ичинде яхшы иш де гёрсетген. Республиканы алдынлы адамларыны гьакъында язгъан макъалалары, очерклери, репортажлары саялы огъар "ДР-ни маданиятыны ат къазангъан къуллукъчусу" деген гьюрметли ат берилген. Ол журналистлени "Алтын къаламына", Дагъыстанны халкъ шаири Анвар Гьажиевни атындагъы савгъатгъа да ес болгъан. Пенсиягъа чыкъса да, Солтанбек Солтанбеков бугюн де редакция булан тыгъыс аралыкъ юрюте.

Артдагъы йылларда уьлкеде юрюлеген реформаланы натижасында Дагъыстан радио, ону милли тиллерде берилишлер юрютеген редакциялары да кёп уллу четимликлеге тарыды. Берилишлени заманы кемитилди, милли редакцияларда ишлейгенлени санаву кемиди.

Ишде ёлугъагъан къыйынлыкълагъа да къарамайлы, берилишлер, программалар къужурлу ва маъналы болсун учун къумукъ редакцияны къуллукъчулары Патимат Агъарагьимова, Иса Агьматов, Гюлбагъдат Омарова, редакцияны звукорежиссёру, ДР-ни маданиятыны ат къазангъан къуллукъчусу Умалат Мусалаев къайратлы кюйде чалышалар. Къыйынлыкълар узакъ къалмайлы таяр, Дагъыстан радио да жамиятыбызда оьзюню абурлу ерин табар деп умут этебиз.

Бугюн биз къумукъ радиону редакциясына гьар заман оьз къошумун этеген мухбирлерибиз Алибек Салаватовну, Набиюлла Магьамматовну, Абдулвагьит Салаватовну атларын кёп сююп эсгеребиз.

Дагъыстан радиону 80 йыллыкъ юбилейини гюнюнде къумукъ редакцияны оьсювюне болушлукъ этген РФ-ни халкъ артисткасы Бурлият Ибрагьимованы, РФ-ни ат къазангъан артисткасы Бурлият Элмурзаеваны, Дагъыстанны халкъ артисти Магьамматзапир Багьавутдиновну, шолай да белгили композиторлар Аскерхан Аскерхановну, Хизри Батыргишиевни, Бамматхан Адилхановну, редакция булан аралыкъ юрютеген язывчуларыбыз, шаирлерибиз Камал Абуковну, Магьаммат Атабаевни, Бадрутдин Магьамматовну, Агьмат Жачаевни, Зулейха Атагишиеваны ва олар булан янаша кёп-кёп оьзгелени атларын эсгермей болмайман.

Бугюн иш ёлдашларыма ва бары да радиотынглавчулагъа, Дагъыстан радиону 80 йыллыкъ юбилейи булан гьакъ юрекден къутлай туруп, олагъа къатты савлукъ, узакъ оьмюр, ишде уьстюнлюклер ёрайман.


Опубликовано:
газета "Ёлдаш", 14.12.2007

Размещено: 22.12.2007 | Просмотров: 3750 | Комментарии: 0

Комментарии на facebook

 

Комментарии

Пока комментариев нет.

Для комментирования на сайте следует авторизоваться.