Кумыкский мир

Культура, история, современность

Той, "бузулуп" барагъан къумукъ той... Бельгияда

Алдагъы девюрлерде Белгияны тахшагьары Брюссельге ювукъ ерде бир къумукъ жамияты, оьзлеге геч гелгенни къондуруп, ач гелгенни тойдуруп бир-биринден къуванып, къыз берип, къыз алып, уланларына той этип, йыракълардагъы Ана элинден, Ата юртундан ой этип, дослукъда-татывлукъда яшай деген буса инанып да битмес эдик. Амма гьали энди инанмай нечик боларсан, эгер де бу гьакъ герти зат буса.

Апрель айны 8-нде бютюн "Аврупалы" къумукълар жыйылып Гюнбатыш Европаны Къумукъ юрту - МОЛДА (бу гьакъда биз газетибизде алда язгъан эдик) эсги ювугъубуз Зафер Оьзденни ожагъында уллу той яхшылыгъы болгъан. Ол уланы Чингизни бир гёзел къумукъ къызы Сибель булан уьйлендирген. Тойгъа бир жума алда гьар тюрлю уьлкелерден къонакълар геле башлап, сююнчлер булан толу гёзел гюнлер гечиргенлер. Тойгъа, гертиден де, кеп халкъ жыйылгъан болгъан, гьакъыкъатгъа Зафер ювугъубну уланы Чингизни тою Европа къумукълугъуну уллу байрамына айлангъан. Тойгъа гелгенлер бир жума узагъы бир-биринден сююнюп, бир-бири булан дертлешип, бир-биринден айрылып болмай да тургъанлар. Не гючдюр дагъы ватанындан тышда бу адамланы бир-биринден айрылма къоймайгъан, бир-бирине уьзюлмесдей байлайгъан? - О гючню аты белгили - о къумукълукъ.

Свадьба в Бельгии Бу "бузулуп" барагъан къумукъ тойну есилери ва ортакъчылары оьзлени бу йыбанчлы мюгьлети - "бир гюню, бу гюню бизден гетемесин, бу гюнню сюймейгенлер мурадына етмесин!" деп алгъыш этегендей эсделикге ортакъ сурат да алдыргъанлар. Компьютеримде файлны ачып бу ренкли суратгъа къарайман, онда юзге ювукъ адам, юз келпет бар. Сукъланасан, не гёзел юзлю адамлардыр олар, эргишиси, къатыны-къызы булан. Сизде бир багъыгъыз, оланы гьасирет гёзлеринден таба, балики де, Таргъудан, Эндирейден, Къазанышдан, Къумукъдан, Жюнгютей булан Яхсайдан, Оьтемиш булан Къарабудакъгентден ХIХ-нчу юзйылны ораталарныда ва ондан сонг мугьажир болуп ят эллеге (гурбетлеге) оьзлеге насип излей, яшавлукъ излей гетген оланы ата-бабалары бизге гьасирет багъадыр.

Тойну есиси Зафер тойгъа чакъырылгъандан эсе, бир-нече керен артыкъ къонакълар гелип, гьарисине тийишли кюйде терегев-сый этип болмагъанмандыр деп къыйнала:

Тойну хабары етгендокъ, ювугъум Заферге мен интернетден таба булай къутлав кагъыз йибердим:

- Ассаламу алейкум, Зафер-къардашым!

Саламлар болсун сени булан бирге бютюн Къумукъ юрту - Молгъа.

Yavu.net\'de охуп англадым яхшылыгъыгъыз болажакъны. Аллагь яхшы сагьатын къаршы этсин! Уланын уьйлендирмек уллу насип, уллу шатлыкъ. Болгъан яхшылыгъыз узагъындан болсун. Яшлар тюзелип-онгуп яшасынлар, уланлы-къызлы болсунлар!

Гьакъ юрекден къутлайман ва яхшылыкълар ёрайман. Болгъан сонг тойлар болсун, къумукъларыбыз гьар даимде яхшылыкъларда ёлукъсунлар. Билген бусам, ювукъда болгъан бусам, тоюгъузгъа мен де етишип гелер эдим.

Эссен-аман туругъузз!

Сизге гьаманда яхшылыкъ ёрайгъан - Камил АЛИЕВ

Шо гюнюнде интернетпочтабыз жавап да гелтирди. Онда булай айтыла:

Bek ayavlu Kamil,

Barigiz da sav boluguz, baribiz da esen aman bolayik da kop toylar eteyik bulay.

Bilemen, ulan uylendirmek, namusu bulan gizyas yolcu etmek Ullu satlik.

Olani yaginna bir ullu satlik da yuvuk-uzak demeden Danimarka, Almanya, Fransa, Hollanda, Turkiya\'den bari da "YAVU"yurtlulani birce, munna ciyilmalaridi.

Aytganlaring bek suyundurdu meni, seni ozung gelgencagi boldu, savbol. Saga bir surat yiberemen, barisi da Gumuk taptazza, Yoldasga beripbolursan. Bari da Kumuk yurtuna selam dep aytarsan, barigiz da esen aman turuguz.

Zafer OZDEN.



- Бек аявлу Камиль!

Барыгъыз да сав болугъуз, барыбыз да эсен-аман болайыкъ да кёп тойлар этейик булай.

Билемен, улан уьйлендирмек, намусу булан къызъяшны ёлчу этмек уллу шатлыкъ.

Оланы ягъынна бир уллу шатлыкъда ювукъ-узакъ демеден Даниядан, Албаниядан, Франциядан, Голландиядан, Тюркиядан бары да "Яву"-юртлуланы бирче мунда жыйылмаларыды.

Къутлавларынг (айтгъанларынг) мени бек сююндюрдю, сен оьзюнг тойгъа гелгенчагъы болдум, савбол. Сагъа бир сурат йиберемен, барысы да Къумукълар тап-таза, "Ёлдашгъа" берип болурсан. Бары да Къумукъ юртгъа (элге) салам деп айтарсан, барыгъыз да эсен-аман туругъуз!

Зафер ОЬЗДЕН

... Муна, гересиз, шулай заманлар. Болгъан сонг тойлар болсун! Къумукълукъ сёнмесин!


Опубликовано:
Газета "Ёлдаш"

Размещено: 06.06.2006 | Просмотров: 3967 | Комментарии: 0

Комментарии на facebook

 

Комментарии

Пока комментариев нет.

Для комментирования на сайте следует авторизоваться.