Кумыкский мир

Культура, история, современность

Нечик гьасил чыгъарайыкъ?

Мен Хасавюртгъа барсам, "Къумукъ тюз" газетни редактору Рашит Гьаруновну янына гирмей къалмайман.

Бу гезик мен Рашитни столну артында ойлу олтуруп тапдым. Толу кюйде сорашып да битгенче, ол магъа бир кагъызланы узатды. Оларда язылгъангъа гёре, "Дружба" деген газетни баш редактору М. Шайыхмагьамматов "Къумукъ тюз" газетни баш редактору Рашит Гьаруновну ишинден тайдыра.

- Башгъа газетни баш редактору сени ишден тайдырма нечик бола? - деп сорайман Рашитге.

- Шагьардагъы авар, къумукъ, орус тиллерде чыгъагъан уьч газетни учредители шагьар администрация эки йыл алдын оьзюню къарары булан берген огъар шо ихтиярланы. Шо къараргъа гёре мен Шайыхмагьамматовну заместители болмагъа герек эдим. Эки йылны узагъында мен шогъар болгъан кююмде къаршы турдум.

- Гьали не этежексен? Судгъа беремисен?

- Токъташып битмегенмен. Бир якъдан, бош аваралагъа заманымны йиберме тарыкъмы деп ойлашаман. Озокъда, бизде адилли суд болгьан буса, шолай ойлашмажагъыдым. Ондан къайры, мен оьзюм де мени ишден шу кюйде тайдыражакъгъа гьазир эдим. "Къумукъ тюзню" харлысызлыгъы, эркинлиги учун мен бары да болагъанымны этдим. Къумукъ газетге башгъа миллетни адамы ёлбашчылыкъ этегенине мен рази тюгюлмен. Халкъны алдында намусум таза. 21 йыл алдын шу газет ачылагъанда, редактор болуп гел деп, Къумукъ халкъ гьаракатыны активи чакъыргъанда гелгенмен. Шо вакътини ичинде ерли гьакимлеге ювукъ боламан деп айланмагъанман, гьар заман да къумукъ халкъны пайдасына ишлеме къарагъанман. Баракалла учун тюгюл, оьзюм дагъы кюйде болмайгъаныма гёре. Ишден таягъаныма талчыкъмайман. Шу авур юк, намус елкемден тюшгенге шат да дюрмен. Не зат яман тие деп сорай бусанг, айтайым: шу ишге мени къумукълар салгъан эди, гьали башгъа миллетни адамы тайдыра. Гьали оьзюнг гьасил чыгъар.


"Ёлдаш", 16.09.2011 г.

Размещено: 19.09.2011 | Просмотров: 2556 | Комментарии: 0

Комментарии на facebook

 

Комментарии

Пока комментариев нет.

Для комментирования на сайте следует авторизоваться.